sagooor

ساجور بت اللذين احبهم سرا
 
الرئيسيةالبوابةمكتبة الصورس .و .جبحـثالتسجيلالأعضاءالمجموعاتدخول

شاطر | 
 

 مكتبه الشاعر محمد طه القدال

اذهب الى الأسفل 
كاتب الموضوعرسالة
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: مكتبه الشاعر محمد طه القدال   الإثنين ديسمبر 22, 2008 1:05 pm

الطمباره والغناى

للشاعر/ محمد طه القدال

لحن الاست اذ/عثمان النو
غناء مجموعه عقد الجلاد


نحن اهل الفرحه جينا

لاالمدامع وقفتنا ولاالحكايات الحزينه

لما درب الرايحه جابنا جابنا في هادى المدينه

ياولدى الدروب شقاقا بحر التيه

ليك درب ولا دربين مساك الدروب ضهاب

ليك قلب ولا بالين وسواى القلوب كضاب

ليك ضهر ولاسرجين ركاب السروج وقاع

شق ياولدى بحر التيه بتتدردر وتتودر

ولامن يوم علي تايتنا ديك ترسي

نعزك بالقبيل داخرنو ليك

الشوق بحر ياولدى بحراً تيه

قت ليك العليك ادرابو لا تنغش ولا ترضابو لاتنغش

في الزمن الزمين والكي يسوهو خلاف عشان الني

عليك الدور وتصريف الليالي بدور تشيل ما شلنا من الهم

ولا من دمعه ترمي الدمعه فوق دربك

روح يابا .. وابق قفاك لاتعاين ولاتعاين علي موطاك

ولا تندم علي خطوا تملي مشيتو لى قدام

وابقي العاتي زى سنطتنا زى صبرا نلوك فوق مرو زى الزاد

لاشيتاً نزل في الجوف ولابرجع ولا بنزاد

واركز للبجيبها الريح تقيف انت ويشيلها الريح

وابقي العاتي والدرب الوراك مسدود و شيل شيلتك

بقيت للنص لاحلما بجيب البر ولا حدود

وانبليتا اختا الرمله ما تقع البكان الهش

هي الممطوره مابتبالي من الرش

النعمه بتعرف عاطيها والجمره بتحرق واطيها

بالكيله عطانا و ما لقينا فوق جمر خطانا وما لقينا

يوم الوعد... ياحليوه فيك الدنيا ما كانت شروق

الا الارض متكشفه متبلمه نعمنو من خير الخريف

لافحالها شال منطرحه خضرا وفرحه دوب تتشابي لي عين الشمس

من بت حليوه النفس بيضا كذا الحليب

والروح مشحتفه في البلود الفيها ريحتك

للبعود من فزعة الغربة البساسق فوكا

موراجع ولا بالحيل قريب

الروح مشحتفه في الحبيب القلب بكر الدنيا ما شافت جديدو

ولا الحزن دقالو باب

وشفتي كيف يوم الوعد كيفنو مترامي الغمام

والقمري زغرد للبلوم النسمه هبت مرتين

يا حليوه يوم دقيت بارضك فاس خصيب والتانيه في

يوم الوعد والايد تسالم في الايدين

والام تقالد فوق جناها تشمو زين

وحليوه صاحيه حليوة ضاحيه كذا النسيم

والدنيا غيم وحليوة جد جد ياولد قول للبلد

قايل غناوي الحزن ليش شايل مساديرك مجامر دمع ليش

ليش يا بلد والناس تريد والدنيا كل ما نريد تزيد

تملا الايدين تفرح تهش

لو صحيح غنينا بالدمعه الحميمه ولو دموع الفرحه ما لاقت غنانا

بكره نرجع تاني للكلمه الرحيمه شان هنانا شان منانا

شان عيون اطفالنا ما تضوق الهزيمه
[center]


عدل سابقا من قبل Admin في الثلاثاء ديسمبر 23, 2008 3:08 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رجعلك قليبي المهضلم   الإثنين ديسمبر 22, 2008 1:12 pm

رجعلك قليبي المهضلم



رجعلك قليبى المهضلم

يراجع صنوف الغناوى العصية

يراجع معاك الكلام القبيل استباك

الكلام المبهرج وخاوى

الكلام المزيف

ولا فيه غير إحتلام وانفصام

تموت الحروف يوم تقوم القصائد

مقام الطبول والبخور

بشوفك جرايد شواكر حوامد

ولا هامى فيها

عليها المصائب تمام التمام

مغايص بتفرم حشاها

وغبائن بتنفخ بطون البسفو التراب

وحايح لهيب تلهلب وتكوى الجلود

اتف القصائد

إذا مالقصائد دايره ليك البُكا

البِصاحب..رضا..السردار

واتف القصائد اذا مالقصائد

بتنزل مُريده وتسبح بحمد الذى

ابتلاك وهدانى الودار

طِريتك وأنا الكنت قايل

خيالك معشعش جواى

سكنتك ومالاقى فِجة

اخيرلك اقول البحرق حشاى

اخيرلك افضفض جراب الخبايا

أقول الكلام البفكفك سوارك

يوقف جدراك ويرفع عضايا

تضيع الرموز التغنى الكلام

أقول السكاكر أبتنى ورمتنى وكفانا

اقول العساكر تبارى الكبارى

وتفتش قلوب الجهال الشلوخهم هوية

واغنى الزيود والكنانة

كضب..

اقول البنات البفتحن صدورن

يقالدن رشاشك ويخلن حبيبن

كضب..

مراحك يعشى ويفشى

خضارك مرطب يندى الضهارى

ترابك...دخن لو رزعتو الحجارة

بلاك ولاك كروها السحالى

تسفر سعيتك تقنب تبارى

الجداد العقالى

تجوع يا البشدّر خريفك

سوافى البطانة

ويمّطر رزازك عزازا حصايا

وقموحك سنابل مشاط كرفالى

ابيت الكلام المغتغت وفاضى

وخمج

ولادك قصادك شعاع التحايا

يضوّوا الشقوق التلم الدوابى

يوروا الدورب للقلوبهم عمايا

عرقهم حبالك

وصوتهم مشانق

تلم الدقون الكبيرة

وتحدر فقر سمّنتها الليالى الضليمة

بتهدر حرائق وتحمى البياكلوا المطايب

وتسجن بطون الجياع العرايا

وشوشهم سمر حر اباطك

صفوفهم مرامك وحلمك حملهم

رغيفة وكرامه وسلامه

مصانع بتحرق قبل تبدا فيها

مزارع بتيبس ونيلك ممدد جنازة

وعقيدك وسيدك بيكتب ويمحى

وتبق المحايا[center]


عدل سابقا من قبل Admin في الثلاثاء ديسمبر 23, 2008 3:08 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 1:16 pm

حليوة ليلة المولد



بقول غنوات وأقول غنوات

فى البلد لبسير جنياتها لى قدام

ولى الولد البتل ضرعاتو فى العرضة

ويطير فى الدارة صقرية

ولو السمحة تلت إيد ومدت جيد

يقوم شايلاهو هاشمية

ويشيل شبال ختفة ريد وفرحة عيد

وريدة روح وحمرة عين وايدية

ويالولد البشيل مدقاقو

قولة خير على القمره

يقابل الجاية متحزم

ويدارك الجاية متلزم

كلام فاسك على أرضك

يبقى عديلة يا بيضا

ويبقى زفاف تزغرد ليه قمرية

وقبال حول تغّيم غيمة قِبلية

ترش الدارة والحدبه الصعيد الحلة

ويا فرحة بتطارد الصفقة فى النسمة الصعيدية

ويا جهرة نهار الليلة بدرية

رحيح جنياتنا فى الحدبة الصعيد الحلة

يا سمحاتنا هو لبلب

ويا قمحاتنا هو لبلب

وياللوز الفتق فى الوادى هو لبلب

ويا سمحاتنا هو لبلب

ويالبحر الطمح مدّادى هو لبلب

سألتك بالذى ركز الارض معبد

وسوى الفاس عليها مقام

سألتك بى حشا الأُمات ودمعاتنا

سألتك بى كبيداتن ودعواتنا

شليل وين راح

يكون ضل الخريف فاتنا

شليل وين راح

وزى برق السماك الجابها دغشية

وزى زغرودة البطن الكبارية

مرق من شامة القمره

ومقدم بالعديل يبرا

تعالوا أبشروا آجنيات

شليل ماراح شليل ما فات

شليل عند المسورو حرق

بقالو حصاد

شليل فوق التقانت قام خدار وبلاد

شليل مسدار شليل مشوار

شليل أرضنا يا جنيات

شليل قايم نصاصى الليل

يتمتم ليلو وردية

حرازنا شليل شليلنا دليب

شليلنا دليل على البلدات

بعد درب التبلدية

شليل ما راح شليل ما فات

شليلنا ونحنا همباتة ومهاجرية

مزارع بات على عشقين

تراب بلدو وسماح فوق بت مزارعية


عدل سابقا من قبل Admin في الثلاثاء ديسمبر 23, 2008 3:09 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:18 pm

المدينه الفاضله
في هذي المدينة الفاضلة
لبس الشعراء تيجان غار وهجوا مع النشيد .. والبوح
وغنوا للغربة المتلتة في الزمن المكان الروح
وما بين الرماد والنار فضا الكلمات ومعناهم
بيمرقوا من هطيل النوح ومغناهم يشقشق للحياة والموت
يغرد للمدائن الفاضلة جواهم جزاير دوح
-2-
قدر يوتوبي ترحل في مداين الناس ... مدينة
يندلق حسك حداهم قطرة قطرة تعبي صوتك بي نداهم
مشدود وتر صوتك ربابة مسنود عليك صوت الغلابة
مفرود من الزمن المفتق والمرتق بالرتابة
مولود مع الجدة المعتقة والمجرتقة بالرحابة
ينسدل من شدوه إنشاد المزامير ينسمع في شجوه ترتيل الصحابة
زمن يوتوبي ترحل في العتامير والمغاسل والغنى المندلي من شطر السحابة
من عنا الأطفال وأولاد المسادير السنينهم فوق جوازات العصافير
الحنينهم بحة الليل الطنابير الحزينهم حزنه في الجوف المطامير
نبله يطلع زي شعاع لا ولولة لا شيل ندابة
-3-
( يامطر عز الحريق ) ( كمّل الناقص وفرضو) )يا مشاوير الطريق)
شوفي حميد وأرضو يا بلد ليلك غريق
طولو زي طولك .. وعرضو
إن ضلامك حر طليق
أو سلامك أهلو قِرضو
آه من هذا السليق
يشتري الراجل وعرضو الفرج باقيلي ضيق
والصحاح العندي مرضو
كم إديريجاً حليق
شان يعيش بي دقنو برضو
يا مدد قشة غريق
( يا مشاوير الطريق) (يا وليدات الفريق )
لملموا الصابرين تعالوا ( رقصوا البنوت أعرضوا )
-4-
يا نخلة المقبول ظلالك واصلة الشموس بي حريرة
ومجدولة من طيب شمالك مروية عز الجزيرة
من همي همك سمالك كسر همومي الجبيرة
لحن الوليد الرمالك مشرق يجبر كسيرة
طينك مقالد رمالك تحتك مياهك خريرة
شعرك جريدك حلالك نمة غُناه الضريرة
غنوة بتقرب منالك
رعشة جروفي الخضيرة غنوة حبيباً شكالك
هجر البنية الأميرة عند الترابلة القبالك
ضليلة صهد الهجيرة
يا نخلة السلفاب جمالك في الناس غناوي المسيرة
لو جيدك الفارع بكالك موّال دموعي العسيرة
أو نيلك السالك أمالك جيهة المشاوير الحسيرة
أو قبلك المفجوع دنالك روح الأناشيد المنيرة
شيليلي عِب وأمليلي شالك من غناويهُ السميرة
شدي من صوتك حبالك نشفي العرق الدميرة
قولي للجنيات سؤالك يا نخلة بس متكية مالك ؟
بطنة سبايطك عضيرة ؟
جدلة سبايبك ممالك محصورة في فد ضفيرة ؟
ولا السلام البدالك سراب الأماني الكبيرة ؟
لو صبري بيهدم جبالك شن تبقى غير عيني الهميرة؟
-5-
قدر يوتوبي ترحل يا صديق
زمن يوتوبي ترحل في البريق
والمدينة الفاضلة نامت في العتامة
والعتامة تهاتي بالشعر الهيافة
والشعر متغطي بالكلمة السلامة
والسلام متداري في الولد الشليق
والوليد مندسّي في الحرف القيافة
والحروف الوردة تحلم بالرحيق
والحلم يتجاوز المعنى الرهافة
والمعاني تعاند الزمن الرحيل
والزمن يوتوبي يرحل في السحيق
والرحيل يوتوبي ترحل يا صديق ؟
الرحيل الشفتو للناس العلامة
الرحيل الشفتو للمتلك قيامة[center]


عدل سابقا من قبل Admin في الثلاثاء ديسمبر 23, 2008 3:09 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: مهادي الصيد   الإثنين ديسمبر 22, 2008 4:26 pm

مرقن
صباحا جيت من عين بروقن
خايفات مهاوى الصيد خايفين حروقهن
هن فوقنا متسابحات وعبوننا فوقن
مرقن من الجايات ختمن مروقن
جيتك كما الجمرات راجمات علوقن
من نورى متطابقات حالفات يقوقن
طيرتين من الجنات منحلى طوقن
نشدن غناوى الخير طرقن حلوقهن
من مغرب الغنوات لا عند شروقن
تابات مع البنوت لا زمات عشوقن
شبلنو متسابقات متساوى روقن
شيلن بلا خيلن والعزة طوقن
نخلن بلا شعرن والنيل عروقن
ما بردن فاترات يوم حر سوقن
ما قبلن حارنات خوف البسوقن
دمرن شعاب الروح فى يوم نشوغن
بلدن قلوب الناس والحنة شوقن
هن عرفن الخلقن خابرات خلوقن
تمن تمام الكيف حسبن فروقن
ايش البلد حيكون ناقص دلوقن
غنن بنينة الخير فوق حادى نوقن
بنن بنن بانينة يا بنينة هى
نبنى البنا البانينا يا بنينة هى
باسم الله ابتديت يا ربى يا بارينى
والصلاة والسلام للحبه بارينى يابنينة هى
الوطن السماح الحبه بارينى
قلبى على الولد قلب البلد بارينى يا بنينة هى
مامنعوك من شمس الله ما منعونى
والكلمةالحقيقة حقيقة شمس الكون يا بنينة هى
للغبش السواد غنوة وشفا المكنون
للظالم سياط تجلد قفا الظربونى يا بنينة هى
ما منعونى من ريحتك ولا منعوكا
ما كازوك لو عرفوا العنا وعرفوكا يا بنينة هى
الغنوة البحجرا عليها بالبازوكا
دوب سجانها فز وفرهدت فى شروكا يابنينة هى
ما منعوها من شوفتك اذا منعوها
تلقاك فى الارض فى امها وفى بوها يا بنينة هى
شارياك بالنفس ما همها الباعوها
لا نايحه بتنوح لا أذنت مندوهة يا بنينة
ما منعوك ما منعوها ما منعونا
شيل الناس وشم الطين وشوق أمونة يا بنينة هى
ما شفنا البكيل نقص حوافى الشونة
ما كبر الصغير بى نفخة البالونة يا بنينة هى
كيف العاصمة تبقى الشاية للحرية
والعكاز مضبب والزمن جهدية يا بنينة هى
نحن عروسنا قولة حق نشيلها هدية
لى ابو قدوم ونورى حليوة والمكنية يا بنينة هى
نحن الكلمة شمس القايلة ما بنلوكا
سن الحق على الظربونى حلق الشوكة
جنياتا بعرفو الغنوة شدوا سلوكا
شالوا الحق نهيض نقزى وضرب دلوكة
نحن بلدنا راسية النيا يراضى حدوبا
فى الغرب الجبل فى النص جبال النوبة
فى الشرق التلال عطرون علاج القوبة
والبركل مع الاماتونج ركايز الحوبة
نحن بلادنا باولادها البعرفوا الراطنة
احمد ودقرنق واسحاق اخوك وابوفاطمة
لو ما كان قبيل حشف القبيلة الجاطنا
كنا نهضنا لى قدام لحقنا الفاتنا
نحن غنانا للولد البشوف قدامو
للبنت البتسند حيلو شادة حزامو
ونحن غنانا للبلد البراشى غمامو
نطرى جمايلو حميدو وجميل اياموا
جيت ناس فلتكان ختونا فى غوغايا
قالولنا السلام زيت البلد هو الغاية
(شيشانا) القبيل غنونا بالهوهايا
ولدولنا السلام ولدة حبل بالداية
المهدى القبيل ولدا قدل فوق عزة
و(الشيشان) سكوت لا زول عرض لا هزة
يا نص العصا اللاكرة فيك لا فزة
بوش وبلير اخوك ختونا فى قد بزة يا بنينة هى [center]


عدل سابقا من قبل Admin في الثلاثاء ديسمبر 23, 2008 3:10 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:29 pm

فرحه

نقرش صوتك همس البحة
عشرق للعاش ريدك فرحة
فـات الـشوق رف ورحّ
عـلشان يسرق منك لمحة
وريــــدك صـــحّ
جـرحي الـكامن لمن وحّ
رشح الفاطر بسمات سمحة
نرجس منظوم شبه السبحة
ونــام بــي صـفحة
ورد الآسـل زايـد نفحة
مكتوب أكتب عنك وامحى
وعن حزنك ما اظن أتنحى
أبـدع ربي فيك يا دوحة
يا معجزة في أبيات مدحة.


عدل سابقا من قبل Admin في الثلاثاء ديسمبر 23, 2008 3:11 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:31 pm

اصطفيتك

إصـطفيتك أغـلى سـيرة
ولما جيت أرتاح تحت لونك
لـقيتك شاربة مني وشاردة
فــي جــواي مـسيرة
**
وأرتـجيتك بـين مسامعك
طـرفك الـقرب مـلامحك
والـمكان ضـل الـضفيرة
وأرتـجيتك قـول يـشيل
سـاسوية الـكلمة الاسيرة
**
وارتـجيتك فـي وقـوفنا
مـتـين سـحاباتك تـجينا
تـروي شوق بذرة حروفنا
تـرقص الـوردة وتـفرهد
تـهدي لـلأنسام عـبيرها


عدل سابقا من قبل Admin في الثلاثاء ديسمبر 23, 2008 3:11 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:33 pm

ياهذي القصيده...............
يا
هذي القصيدة انجمي
من هذي الغبينة الفينا
من حلوات قصيدي ونمي
الا حروفها طعم الكينا
جبت حلاتها من خشم امي
يا حليلها العديلة حنينة
الا مرار حسارها يدمي
الماسون مفور دمي
والبنا العظيم هارينا
لا البنا العظيم ود عمي
لا الصهيون حدق عينينا
اريت كل البلاد رام الله
اريت الفينا ما كان فينا
فيا كل الغلابا حدانا
يا الفقر البعد غالينا
يا جرحي ودوايا وسمي
يا زقلونا يا طردونا
يا دار السلام يا روينا
يا بيت الحجر في مكة
يا ام الشهيد يا امي
يادير البلح .. يا عكا
يا مسجد عمر يا سينا
يا..... من الخليج لي طنجة
يا كل المحيط الامي
لا الشارون طناش حاضرنا
لا الصهيون غباش ماضينا
ما من غيرنا جات خيبتنا
كتر خير يهود وادينا
ياروح العرب ردي
جري وقومي واشتدي
الغيرك عبر .. عدى
من اشبيلية للسند
كنت الهادية ترتدي
يا روح العرب ردي
شيلي الخطوتين مدي
قبل الخطوة تتمدي
لا بتجيبي لا بتودي
وان ما عندك : ايش تدي؟
يا روح العرب قومي
ختي العافية في قومي
يات من فيك مخزومي
اتغرب نطق رومي
واضحى سلامو شالومي؟؟
يا روح العرب مرة
جيبي الجوة والبرة
والولد الطفش فرة
من بلدا بقت مرة
فوق الراس وهي السرة
يا روح العرب مرة
وري المنعة والحرة
كري مع الشهيد كرة
تجني الغلتين برة
وتلدي محمد الدرة
اصل الحكوة انتا يا الخزين
خدرنا
نمنا على العسل والسمنة
من بعد العسل حلينا
واتحلينا
والماسون يخطط لينا
لامن يا الخزين ودرنا
واتحيرنا
مابين الوعود وسرابو
ما بين النضال وارهابو
قال لينا امنكم حادينا
من دي الكورنة جابو خبرنا
يا العرب الحسابكم جاري
طلعوا زيتنا واتنبرنا
بي حمد الكريم الباري
اننا في اوروبا بنينا
واننا في المحيط شبرنا
ولاس فيجاس نجيها ملاهي
لينا عليها خيل وبكاري
لا ما غطسنا واتوكرنا
وشان الروح تروح من اصلو
يبهت وينقطع طارينا
دخلو علينا باللوتاري
عبونا وبقينا رطينة
تقعد جمعتين في اليانكي
يبقى جوازك اخر زينة
الماسوني سيد امريكا
والصهيوني حاكم امريكا
والشاروني عين امريكا
ما امريكا هي الذبحتنا
ياخ امريكا هي المسكينة
بس حكامنا ما فهمونا
لا طول الزمن فهمونا
قلنا نغني للولد الشهيد
كتمونا
قلنا سبيا ابوكم قشري
ختونا في حديد يا بونا
بس حكامنا ما فهمونا
لا طول الزمن فهمونا
وامريكا بتبيع ما ينشري
ختالنا اليهود في كفة
لافالنا الحروب في لفة
سايقالنا الحزن في الدفة
ما همانا في زول لا زلم لا طينة
ازيدك في الغبينة.. غبينة
عندك غزة
احتلوها فاحتلونا
بعد الاحتلال حصرونا
من بعد الحصار هرسونا
في الضحى والعصر عصرونا
في بلود الشتات زرعونا
بالبلدوزرات حصدونا
لا بيتا وقف لا كرزة
لاتفاح سلم لا عنزة
يا طفل الحجر في غزة
لو هتلر نصب شواية
دول حشروك في طابونة
واتفرجنا والحسرة البتاكل ابونا
واتفرجنا والكل بالغبينة انجز
واتفرجنا واتطمنا ونسينا القبيل ولدونا
يا الخايفين اوان الحزة
دول اسياد ليالي المزة
من كتر الشجب شجبونا
لو كل العيال الشتو من قلب الحبيبة نسوها
نحنا مع الشهيد قيلنا
لامن يا الخزين ضقرنا
لا الكارت الاخيضر شافنا
لا عند السفارة بدرنا
لا الماسون مضالنا الفيزا
لا البنا العظيم سفرنا
نحنا على العلينا بقينا
ما اتذكرنا؟
ما اتذكرنا
كننا ياالشهيد ما نسينا
شان نرجي اليجي يفكرنا
شيل ارض العرب وادينا
من خيرها المرمي عاينا
لا حايق عليك لا فينا
لا ايديها سفلى عطاها
لا مقصر سماها وطينا
لو القسمة بس في نيلها
الفي بطنها يشبعنا
والفي كفها يكفينا
اسمع مني يا طاري البلا وناكرنا
دي الارض الببكي غناها
والارض البغني حزينها
ما من فقرها تفقرنا
وتفركشنا
وتحنكشنا
بس من كجها الكاجينا
وما من غيرنا جات خيبتنا
كتر خير يهود وادينا......[center]


عدل سابقا من قبل Admin في الثلاثاء ديسمبر 23, 2008 3:12 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:34 pm

شيخ تلب


حزينة وجوفك دمدم حزين
حزنت وقلب الحازنك خلى
تعدى الحلم الشفتيهو قديم
وتملا حسارك قلبك ملى
وكل ما هبهب قاصدك نسيم
يلهب جلدك كضباً طلى
فطمت جناك وحضنك رحيم
وحنـّك تب ما صابو البلى
سمعت غناك وصوتك رخيم
شديد اوتارك زايد حلى
عرفت الغم الصارلك نديم
وشفت الكون بى شوفاً جلى
لقيت الكاتلك كافر زنيم
وانت وحيدك قلبك ولى
يا شيخ تلـّب انزل كبكب
وارمى الحترب فى الميضنة
فى الباردة تعب لى الحارة تسب
عجمان وعرب فى المضنة
البس خضرب وادخل قصرب
والحس واشرب فى الميضنة
دى الدنيا تهب شقيش ما تصب
القبلى حرب ..
لى سيدك حب لا تخش ضرب
لى يوسف جب فى الميضنة
دقنا وشنب درويشنا يسوق
تايوتا تكب فى الميضنة
يا شيخ تلب وين الزغلب
الكانو تلب
ديل صبحو غرب
ام اضحو جنب
فى الميضنة
انزل كبكب وارمى الحترب
فى الميضنة
كبس االهم على
والحال قبض يا سيد
غبنا فيا كج
وتادو جنبى معيد
مو جنا تجيب
سلسل جنازرو تقيد
بلا غيبوبة البلد
النصيحو مصيد
كنا تلاتة ...
ود النوق وديك وعتيد
قلنا نكمل الفرض
العلينا نشيـد
جينا عليكى يا المحبوبة
شوقنا يأيـد
بقينا ضهابة متل زولاً
ضرير وبليد
ود النوق مركوبو
العليهو يشفق
بقى يتباطأ
فى خبة مشيهو يلفق
ان جاهو العلوق
صيحة نفاقو تنفق
اصبح جدوا وكل
ما شافلو سلقة يصفق
- وديك الجن
رفيق همى وغنايا وفنى
سوا طريقو فى نخبة
وصبح متهنى
ما هماهو باسط مية
سكرة ينى
كل ما شافلو زفة
جديدة فوقة يغنى
- يا عتيد الرماد
نط الحيط بالزانة
تفضى الخانة
تلقى جنابو سيد الخانة
فارش دارو لى اسيادو
بيت كرخانة
غافل ضبحة الفجرى
وجرى السلخانة
يا حميد اقيف
شوف الخلوق محنانة
كفكف دمعتك
والعبرة فوت خنقانة
عسلك سال بحر
فوقو النحل ونانة
ياد ان طاق غرق
جازاك دباير دانة


عدل سابقا من قبل Admin في الثلاثاء ديسمبر 23, 2008 3:12 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:35 pm

صابرين


ياحزن الغنا
صابرين
من بعد الضنا
صابرين
على وعد المنى
*****
برجاك
يا وكت الحبيبة
وبلقاك
فى الفرحة القريبة
وبشراك
يا أم السنا
*****
لا ليل ولا حزن طايل
لا صد ولا دمع سايل
لا هم جاك يا أم نفايل
والنيل فاض وإنحنى
نيلين
وحلمك أنا
فرعين شايلين جنا
*****
عشرات حبابك
سلامات
شايل سحابك
سلامات
والقبلى شابك
سلامات
خيلك سنابك
سلامات
وهواك هنا
صبـّين
عاشقين ترابك
سلامات


عدل سابقا من قبل Admin في الثلاثاء ديسمبر 23, 2008 3:12 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:36 pm

سمحه وسمريه


سمحة وسمرية
محبوبتى ولفتاتا غزالة
خضرة ومسقية
وجنب النيل مشتولة النالة
بهواك يا بنيـّـة كتبتو قصيد
وبقولو مقالة
بتفتحى فيـّـا معانى غناى
تديلا مجالا
*****
زهرة وبرية
بشوق الأرض عيونا كُحالة
تريانة ندية
بعرق الناس
والناس فى بالا
يا خوفا علىّ عقل وثبات
ماها الولوالة
*****
من فرحى البيا
قلعت الخوف وكستنى بسالة
قت ليها النية متين نتلم
والحال بطالة
قالت لى غنية وإنت معاى
مستورة الحالة
بت سودانية
محبوبتى ولفتاتا غزالة


عدل سابقا من قبل Admin في الثلاثاء ديسمبر 23, 2008 3:13 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:39 pm

امونه

أمونة
محمد طه القدال
---------------
ما ضهبت اقول لقيتك
وانتى فى كل الخواتم والمياتم
والنجيمات والعواتم
ما حزنت اقول بكيتك
نحن فى حزن المخاليق
والمغنين المطاليق
الفرح جاييك وعد
غنوة اولاد التحاريك
السعد ولا البعد
البعد ولا السعد
كنتى فى ليل الخوابى
تهاتى بينات الطوابى
تحاكى جقليب السعى
الجنيات خلو حجرك ريح يفوفى
وعين مزرزرة من شقى الفرح المرابى
ومنية الوعد الدعى
يا ديارى الوين ....أنى
تور عفين الشين .....أنى
ما اضينة وزين انى
تور عفين الشين انى
وانت فى شوفك تخاتل رفة الطير والحفيف
وانت فى خوفك تكاتل عينة الجلبت خريف
وانت فى لالوبة مصلبة البنيات
النسيمات الهفيف
وانت فى لالوبة مشنقة الوليدات
ناس نجومى ومحبس النفس الرهيف
بطنك كرشت غى البنات نافى
دقنك حمست جلدك خرش مافى
وكت الوهم نافيت .. صدق الوعد جافى
وكت العلم جافيت .. مر الصدق وافى
وكنا بنشيل الغباين والاناشيد
جهدية الاورطية
جهدية الحلبونا
شدو جمالم جونا
حلبنا ليهم سمسم
والسمسم ما كفاهم
جلبنالهم سعية
وجينا للبقعة ام قبايل
سيل من الوادى الكبير
الكفيف شايل الكسيح
يا عيون ود الضكير
واحدة من توشكى
تقلع
تانى تقلع فى المطامير
يا جبة الدرويش
البابا بسل العيش الله بسلا
والبابا خدمة الديش الله بسلا
البابا القول بى شويش
يا عيون ود الضكير
عماك فى حقك ديه
لى زمنا مو جهدية
جهدية الاورطية
جهدية الحلبونا
شدو جمالم جونا
وحلبنا ليهم سمسم
والسمسم ما كفاهم
جلبنالهم سعية
يا عيونى شن بتشوفى
ويا امونة شن بتشوقى
شدرا تال اليمامة
ولا الصقر الحمامة
ولا البطن التفوفى
يا امونة شن بتشوفى
ويا عيونى شن بتشوفى
جهدية وسيف وراية
تبروقة وخيل وشاية
اذان بالجوع اذن لى
ام خوفك فايت خوفى
يا امونة شن بتشوفى
ويا عيونى شن بتشوفى
تلت التلاتة شلق
تانى التلات محلق
والتالت جا يبشرنى
سرقوهو الدايرين حتوفى
يا امونة شن بتشوفى
ويا عيونى شن بتشوفى
شايفة الدموم واللمة
بين الدقون والعمة
ولانى فوق معلق
صقر الحدى مندوفى
يا عيونى شن بتشوفى
ويا امونة شن بتشوفى


عدل سابقا من قبل Admin في الثلاثاء ديسمبر 23, 2008 3:13 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:41 pm

أحلام الحزن الفرعوني
الشاعر / محمـد طـه القـدال
الحلم الأول

بحر المالح سيلاً ضرّع و موجاً فرّع من الشام
من ناك للسهلة النجدية
الأم البكر الزنجية
يا وادي الزنج
لو آخر خيمة إنقجت كانت ركزت فوق سنار
لي ريحة القهوة العربية
كانت فابريكة بن
كانت مشتل أبنوس
كانت فى الشعر القرقد قايم شتله تجامل الشتله
التفل الروس
كانت فى الطبع الحار
الريد الحار
الحزن الحار
الحزن الجن الأحمر
كان مهووس

الحلم التانى
الخيل فى الخيل
و الخيل فى الخيل
لي فاطمة أم حجل
العرجون
الخيل مرحات
النوق مرحات
الخيل الدفرت
دفرت وادي صعيد أسوان
للبت البكر الزنجية
النوبة تصيح
لي حلفا نبيح
للنهد السابح فوق الريح
للعشق الساخن رجاى
الخيل الدفرت
دفرت دنقلا دون لا جاى
الحلم التانى
المد التالت غاشي الدامر بالعطرون
النار ما حرقت دار شنقيط
النار ما بتحرق وادي الزنج
النار آبنيه
يابنية العرب الزنجية
و بنية الزنج العربيه
النار فى النار
نيران ألوان
شيتن قرأن
و شيتن يا حليوه الحزن الجاكى يكون غبيان
و شيتن فى الفرح التايه فيكى
كذا الضهبان
وشيتن فى قليب الجدى الهشة الرخص النيه
الريد الليك متحمد
سركى مسوكر جاك آبنيه بلا عنوان
الحلم الثالث
التربة الأولى الموس الشفرة الصغرى
التربة الأولى الموس الشفره الصغرى
التربة الكبرى الموس الشفره الكبرى
التربة الكبرى الموس الشفره الكبرى
الوجعه الكبرى
الستر العار
العار
العار
الشهوة انبهلت
إن المؤوده انسألت
يا ووب البطنه الطلعت
يا ووب البطنه الرجعت
يا ووب الروح الطلعت
روحا مرقت تردح يا فرعون
يا ووب الأم الجاضى حشاها
العين فى السما و الليد فى جناها
يا ووب الضاقت فى الميلاد
أم ستراً مكشوف غطيها
البت يا دوب بكريها
ألحق يا الطايل باعك
نادهاك فى الضيق
الفا الدركان بسراعك
سهل فى الحوبة قساى
وبرد في الحارة حشاى
الرحم انشقا
و دخلت مرقت دخلت مرقت
..صلت ندهت سكتت كتمت
سكلت
إن المؤوده انسألت
اللهب الهبله النار
المهلة آ ناس
المهلة تطير
الرحم انشقا
المهلة متين ألقاها
و السهلة متين ألقاها
المهلة حليل
السهلة حليل
البلد الشجر البحر الطير ووباى
الريق نشفان من القوقاى
وكان فى الحلة الناس بتجض
و اللوز فى القطنه هناك بيجض
و النسمة التائهة وغاشية الحلة سموم بتجض
و البسمة انبهتت ونزلت دمعه وفوق للدمعة
عيون بتجض
وداك اليوم
مسيخه حليوه يا فرعون
لهيب بيبق
وقالوا قبيل كمسيب الغبينه يشق
و ألاّف الألوف رايح
و أكّال الكتوف رايح
و البمشى فوق زبد البحر
الببلع السيخ و الحجر
ويا الدمع النزل فى الحارة
دميع الرجال غلاب
و يا الغبن الوقف فى الحلة شوكت حوت
يكون حزناً فدر فى رجالنا مو كضاب
يكون حزناً فدر فى رجالنا مو كضاب
العارض متواجد حالياً رد باقتباس


عدل سابقا من قبل Admin في الثلاثاء ديسمبر 23, 2008 3:14 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:42 pm

صداح الغنا --- يا محبوبي



يامحبوبي ..

هـاك منّى مكتوبي .

صـدّاح الغُنـا المكتوم

ومدّاح الجمال والنور

كلمة حُـب فى قلب حبيبي

وقليب حبيبي من توبي

تشـوِّش جـوّه قلب النيل

مع اللهفة العلى ولدى

يا معشوقي ..

ليك من شوقى كل الشوق


فيا الخرطوم إذا نامت عليك عيون

تشوف الضلمة في الضحى

والنَهار مخنوق

ولو غنيتِي والغُـنا للسلام مخنوق

أعرفي إنك الزمن اللى جاي شـروق

وأعرفي إنك .. الزمن الحبيبو حنون


فيا الخرطوم ..

عيون الحق ما بتنوم

أعرفي إنك ..

الزمن اللى جاي شـروق

وأعرفي إنك ..

الزمن الحبيبو حنون
العارض متواجد حالياً رد باقتباس


عدل سابقا من قبل Admin في الثلاثاء ديسمبر 23, 2008 3:14 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:44 pm

شمله كنيزه
الوادى البهل نوارو سجادة..
ومرق فى حوله .. فضلة خير..
اشوف يخب مع نسامو
جقليباً غلبنى قياسو
لا قالتلو تروح فى البلا الياباك..
ولا حنت .. وكت غنت حداها نفوس.
واشوفك فيها .. تمرقى من عرق ريحانها ..
تدحلى في التراب تندسى..
تاخديلك نعاساً حول..
وتطلعي تاني .. زي بهرة شعاع فجراوى..
فوق بادى الودي.. ناموس.
اشوف الروس ..تكربت في البلود الساحقة..
قت : شن لاحقة ؟؟..
ياقلب البلد .. يلقاك..
يا درب المدد .. يلقاني.
وين لاحقة النفس يا خية؟؟
شن غير النفس متماحقة؟؟
لا أرجاها لا ترجانى..
خلها للشجر تنسانى..
غلطان العليها يكوس..
ويبقى عليها ..
يا شملة كنيزة الواسعة
هى تلاتية .. لكن قدها رباعي.
***
نجمات الصبح شهدن على الما صاحي..
ما سلبني كفكيف دمعي يوم قلبني..
في جمرك يهب قداح
وما ترتاحي من تالايا ما ترتاحي..
غلطان البجيك مداحي
قم من نومي شفتك صاحي
ترجعى في الزوامل الهاملة
وقتلك تاني.. غلطان البجيك مداحى
قم من نومي شفتك صاحي
ترجعي في الزوامل الهاملة
دربك ضل..
دربك بالصراط متلاوي..
منها لا بتجيك العدلة..
لا من شك تتداوي..
ندهتك واقعة قناعتنا بين لومك وبين لومي..
حسبت البال..
ميقن عندى من زل العتر متروس
قبضت الايد .. أفتش وين قليبي!!..
الايد محننة .. والقلب متباكي..
من دون النقش مديوس.
نعلت ابليس ..
ندهتك تاني في سري..
ان صح المدد طالت..
بيصبح حسي كيف يغباك!!
ندهتك تاني .. لا تقنعتي لا هماك
زمازمك من صبيب جلدى..
ولهاتي الجلدة .. صبحت قدة من تالاك.
ولا اتقنعتي لا هماك!!
بالقفيتى.. ما رامي الدمع بتاً
ولا رامي الدمع بتاً
أعقبى الليل يطول واقصر
أعقبى البينا ايدينا البقت شمسية
نجمة ليل
أعقبى بلاكى.. شن ببقالي..
فيك المونة.. فيك الصرة مدفونة
وما بين الوحيح وغناي
وما بين الرحيح وجفاك
تضيق الواسعة
تصبح شملة .. هى تلاتية لكن قدها رباعي.
***
جانا منادي غنى معانا
من غبش الليالي الضامرة
ضارب نوبة..
سارب حسو للسدد مسامعه الطين
وضارب الغفلة هباعي.
وكت يا ناس مدن تبلع مدن بحالا.. تهرس ناسا
كرفتى الليل متل غرقان يجابد في النفس
قبلتي .. شفت الشفع البتجارو في عينيك..
رفعت ايدي لقلب السما السابع..
لقت ايديك
وكت يا ناس مدن تبلع مدن بحالا.. تهرس ناسا
عرفنا البينا .. حتحتنا النجم بغنانا
كان الصوت مرق واحدة
قلنا النوق متين دارت تصافع الجرة..
تهرج في الصقع ضراسا
عرفتي البى.. زغاريدك تصلصل
قلنا : كل ما امتداد يمتد .. نبني حواه..
كرتونة وزرايب ناس
ومتل الكان ضحك جواك
جفلت عليك قاصد صدرك اتحوابه
قعقع تاني
كيف يا فقرى تزرب بالعمائر ساج؟؟!!
ومتل الكان ضحك جواك
اقالد فيك تمسكي فى الضلمة ضراعي
يرجع للضلمة غنانا
وين كبر العمائم جملة؟
وين طول العمائر جملة؟
وين أناس.. غناياً للكضب والصاح.. مع غنانا؟!
غنوتك طايرة
شن بسويبا غير ما تبقى جداعي!.
و جانا منادي غنى معانا
من غبش الليالي الضامرة
ضارب نوبة..
سارب حسو للسدد مسامعه الطين
وضارب الغفلة هباعي.
يا شملة كنيزة الواسعة
هى تلاتية .. لكن قدها رباعي


عدل سابقا من قبل Admin في الثلاثاء ديسمبر 23, 2008 3:15 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:49 pm

ف العمر ... [ 1 من 15 ]



الرتينة محمد طه القدال
بنية
لي سالم ولد عتمان صلاة الذين وسموها الرتينة
امها بت علي الخمجان خريف الرازة عزينا
كبار الحلة اباتا وكبار الحلة اماتا
بتمرق ذينة تمشي تهاتي وذينة
بلا الربعة التحجل شاكية من شلكة كتافا
وفوق الجيد علي ضهر البوادي تغني ما خاتية الزرافه
ملاما رصين مقدم زوكا قبال الصحافة
وسلاما ضنين بسيمة ورقة الا تزيد لطافة
وكلاما يطمن الهمباتي والمجلوبة متعارض كتافا
وكان في الحلة يوم حنة علي الشاشوق
مشينا نقدم البنوت علي ضو الرتاين
خدودن واجة تنضح بالفجر والليل يحرك في المداين
وكان الليل ومن الحفلة الا صداها كان ذغرودة كان غناي
رقيص الشامة بت حمدين
وعرضة حامد العولاق
وختة حنة لي يات من حضور ضفرين
و نمات العديل والزين
وعيط ود مجمر زيييين عشان الزينة رقصت زين
وشنق ود سعد طاقيتو شان في الحلة ساو كنتين
وفي الشقعيبة كان راس مالو شبالين
وسهرة وين وبهرة وين وجهرة وين
اقول يابنية ليش ماتهمي ليش ماتهمي
فوق زولا مشلهت فوق زيادك
لا النفس مجبود ولا لحق الغزالة
وقفت وانبهت رماشا
جدعت بالبسم رشاشا
قالت والعيون ضحاكة في ضو الرتين بشاشة
ها المهجوم يهجمك الله كان داير تسيي لي الخلعة؟
عاد من حينها جاتني الحالة
قلتلا لا لا
حات النعمة يا بنية البريد في الريدة ما بيخبر فسالة
بريد انسانك الجواك واريد مهواك
واريدك والله ذي اخر الحتالة
وكل ما االعتمة تنزل سابلة بنسي عناي
اتاوق لي قناديلك
اذا ما الشوق عرف بكاكي اطري غناي
عليك العزة يالمريودة اطريني
وعليك العزة يالمريودة عزيني


عدل سابقا من قبل Admin في الثلاثاء ديسمبر 23, 2008 3:15 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:52 pm

خمســـــين سنة

لأرض الجزيرة أم دوح عندما ضربتها السيول والأمطار

محمد طه القدال


خمسين سنة
وآيدنا في طول مدّهن
لا فترنا من مد اليدين
لا صبنة جاتك يا رحم

يا يمه عرسك
كان دلاليك الهنا
ويا يمه عرسك
كان قبل كمين سنه
وأمس القريب
قتيلي جاييني الوحم

ربيتي كم ؟
اسبيتي كم ؟
عمرتي في ها الأرض كم ؟

رحطك قطيع
يا يمة من مجدة جناك
في الأرض
في الزمن الزمان
والليلة يا دوبك بكر

شلخة نصيبك يا أم عرض
مكتوب تصيبك
لابدق فوقك نحاسي
لا دمع برميهو شانك
ما بقوقيلك شكر
ومترجيك
إجيلي فداك في دمي
ومترجيك
غنايا على الأرض والفاس وبت أمي

إذا ما البيت لبخ جالوص
ومزبل للخريف عِمة
وكان جواهو محبوبين
وهبابين
وخمسة عيال وسحارة
وكان في البيت
عقاب معزاية للشفع
وكان الدنيا يا الضلمه
وكان القبله جهاره
وكانت الغيمه دراره

سبلوقاتنا ما صبّن
سباليق جارنا سوّن جو
ودميع السحاب نوّح
ويا معز اللبن دغّن
ويا البقر الطلق بوّح
جفل في الزيفة ديك روّح
ويا الكلاب يسوّن هو
وقام حتى الجداد كيّك
ويا مرق السنط سيّك
وتمسع وردلوب حيطة
ويا ابو مروه يا ابو مروه
بيت حاجة أم خريف دركان
تجيك من الفريق عيطة

وتقرأ أم احمد البسم الله
في الأولاد
وتقرأ أم أحمد البسم الله
في الأولاد


قت لك أمرقي آبنيه
هي طينتاً في التراب
نية
قت لك أمرقي
فرشاً أطير
هو شن هباب
وشن كراب
وتسمع وردولب
يا المعزة وقعت ناشفة
بين الشعبتين والباب

وقام أحمد يحاوط البيت
أسرع يابا
شقوق أمسيسي والفاره
يا الحوش الصبح ميضه
وبدور مركب
دحين إبقى البلد خرّف
دحين إبقى السرف نعمة
أقيدي اللمبة
يم أحمد
بدور أضهب
وكسر الحوش
عشان الساس
وسيلي علي الحدب
مصرف

وكان اب أحمد المهجوم
بقرأ الفاتحة في سرو
بقرأ الفاتحة في سرو
بقول الجات علي مالك
مليحا جات
علي مالك
تعال آجني
وكنكش فوق كتف خيك
عاد لا حولة ولا قوة
جانا غضب
ومويه ركب
وداك الحسرة
كان الحلّة شربت تب
وكان اتشتت الرصاص
وكان الساس
حتل وانماص
حتل وانماص

دميع السما
ودميع الجهال واحد
دميع الجهال في الضلمة
كان مالح
وكان القبلة في عينينا
دواره
وأصبح بيتنا لتولاتنا كفاره

وشن بتقولي في القبلي
المدمع فوق عشم عشمان
خلاف دمع العشم مو نوح
وشن بقولي في الصباحي
والضهراوي والطوفان
وصدرك آمان
وحجرك لجناكي ضمان
باقية علي المدائن
مونة وقدح ضيفان
وباقية علي الجناين
دوح
ومو غيّرك سفينة نوح
ولا خابت عليك مسرتنا
نتراجك
بالدلوكة نترجاك
بالسلوكة نترجاك
تقوم يا بيتنا
بيت الطين
شراية يوم
لتيبة يوم
ولبنايتاً تخدر
في مسورنا الجاي
ولبنايتاً تخدر
في مسورنا الجاي


عدل سابقا من قبل Admin في الثلاثاء ديسمبر 23, 2008 3:16 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:56 pm

مسدار ابو السره
اماتي القبيل بي حنهن لقني
كرفة وقلدة كيف شوف اللبن
رجنّي حزنا جاني في
ميع الصبا يلجني اطلع
مني يا جلدي المنمل جني
واطلع مني يا حزنًا بقى مكجني

خلني ابدا مسداري
واودي قفايا لي دارا بقت مي داري
جيت الجلدي بيني وبين عضايا الشحمة الا النار بقت قدامي
جلدي الليلة بيني وبين عضايا المافي
الا تراني شوال الكبس نفيخ جلاليب الورم هدانّي
في جلدي الورم قولنلي ولا صحي الورم عضاني
سفريتك مي في النية
ماها الكانت محرية
خابراك عريف زم العربان ولّا قيام الوردية
مالك تريان ومندي كاسي الكتان والهندي
قولك ككيف ترجى البيشان ولا الغربة البي زندي
برق العبدلي الوزني ما طاش يا جاب المزن
فرق ياالضيف فعل الغضبان انفر ثيران الحزن

شن القعدة يا ابو السرة شن القعدة
في ضل العمارات ام كمرتًا بره .. ضقنا الحنضل اليانكي
وبلعنا المرة كملت كوتة التمباك صقعنا الجرة
وكت اتقفلت شقيش قبل بالمرة لن
يأمرنا في بلد المعاني الحرة
الشم خوخّت بردن ليالي الحرة
والبراق برق شوف عيني الصقير بي جناحو كفت الفرة
تلقاها ام خدود الليلة مرقت برة
مرقت برة تغلي مديدة الحلبة التسمن ردفها
السمن المبستر يانكي
والويقود قعيرات الدخان في العين وفي الفشفاش بسوي عمايلو
شن فايدة مديدة الحلبة يا ابو السرة شن فايدة مديدة الحلبة
الويقود يشيلو اليانكي
قامت من دخاخين العمى تلمع وشيها اليانكي مستنيها
كان اليانكي مستنيها في مراية السجم
في الليل لقيتها متل فرايخ الطير مرق ود عينها من ود عينها
رجافة المزمة الحمى جفلت منو وقعت عندي صدرها بغلي
يا ابو السرة شفت اليانكي في ود عينها
حسها للبحر
يمكن يغسل عينها من اليانكي
فتنا الحجرة بالكتة وغتسنا مسافة
تبقى قدر مسالك الريده ما لاقانا من يغبانا في
البحر الفضا التحتاني
ناس عارفاها ناس عارفاك ناس عارفاني
نادينا القعونج والبلطي قرقور السمك ودانا لي دابي الخشش
نادينا عمال الطمي الصارقيلا والقرموط وود الموية وقتنا عليها
كانت نايمة عجال البحر حارساها
كا نت نايمة بين حجرين
وضل ساسوية وعمال الطمي
الصحونا خابرين الدروب لمّو حصى البحر قسموهو
يات من كان سبع جمرات دابي الخشش قال ادوها
في الجمرات تلات سبعات
قلنا ادوها في في الجمرات تلات سبعات
مسكنا دربنا وعمال الطمي مرقوبنا في مشرع مسارب الضي
لقينا الدنيا تترجانا قوقى القمري خوّى صغيرو وعوّى حدي
وعمال الطمي الصحونا لمّو على البعرفو الصي
حصى القيزان دوابي الدارقة والسحلية والناس التحت
خابرين عمايلاليانكي
قولن للاخلا ديارو
دمك فرهد في نارو
غورّ في الارض طارو صقرين
اولاد الارض ما طاروا
لحمي غطى بن عمي شو صار حالو يا امي
منديل العرض في بيت الدين دمي ما يخلي دمي
انا من دير يسن صرنا في جزر التين
عم نسقي بعض حب الزيتون
بدو يرجع للطين صابرا تحت الدورية
صابرة تحت الدورية .. صابرة فوق الدورية
يا حالة ضد لحم الطفلين نابت غصن الحرية جزري مو في شاتيلا
ما قال حالي يا ويلا احنا في الارض
ارض فلسطين يا امي
هيلا هيلا
قوقي القمري خوّا القي وعوّا حدي
وكنا جماعة دابات الارض والسايمة وعوامة البحر والطير
وحتى الغيمة دفاقة المطر فوق راسنا شايفة الدرب
دريب اليانكي لا يودرنا قال الدابي للضليلة خليك صاحية
زوغ اليانكي لايودرنا
قال الدابي ان يغباها ما بيغباني
ولما الشم مودع غاربة وصّت جملة الصقار عيونن كاربة
ابقو الف بفوت للمتلكم ناهدين
وفوق دينن عريبا غادي
قال السحلي لا تغشوهو دول عربان توابع اليانكي
قال الجمعي لا نغشاهو دول عربان توابع اليانكي
وخلوها العريب الغايبة السراق طليقو معاهو
تيجانا عروشها الخروع الهش العويش النار تعلق فوق عقال العرش
ولا خسانا بي هادي العروش الغربة
يا ابو السرة لا عقام مسكنا دربنا وعمال الطمي الصحوها
خابرين الدروب
مرقوببنا من وادي الضلمة الكان عقب لمينا في باقي الجمع قاصين دريب اليانكي
شمور الضيب في الكنغو وخبرا من جنوب امريكا ومن كلهاري ديبا ضاري
والتمساح وليد امزون ونمرا في النمور كمبودي ونمرة خلا الله مكسيكية
ولما لميمنا والشمس البتوقد فوقنا شد شديدنا التمثال مشيل روقنا وعالم حر
يدوعل فوقنا لي يوم فوقنا نبزغ فيهو في عينيهو جر واسوقنا

يا شمس طلي طلي
شاوري على بيتي دلي
كيال الكيل ختياري مات
ظلي عم يحرس ظلي
عادل على خيي ميلي خيي لا يحمل شملي
ما خف الشمل تاني المرات ما كل الرصاص شيلي
عيني في الفيل ما ظله
كلنا ندريه ما نضله
يا ويل الويل نرمي الجمرات
عدّي المستشهد كله
عدي المستشهد كله


عدل سابقا من قبل Admin في الثلاثاء ديسمبر 23, 2008 3:16 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 4:59 pm

حليوة الشاعر محمد طه القدال

"شليل"

بقول غنوات .. بقول غنوات
فى البلد البسير جنياتها لقدام ..
وفى الولد البسل ضرعاتو فى العرضة ويطير فى الدارة صقرية ..
ولو السمحة تلت إيد و مدت جيد تقوم شايلاه هاشمية
يشيل شبال ختة ريد .. وفرحة عيد .. و غيمة روح .. وحمرة عين و ايدية
وفى الولد البشيل مدقاقو قولة خير على القمرة
يقابل الجاية متحزم ويقابل الجاية متلزم
سلام فاسك على أرضك يبقى عديلة يا بيضاء
ويبقى زفاف غنت ليه قمرية
قبال حول تغيم غيمة قبلية
ترش الدارة و الحدبة الصعيد الحلة
يا مرحب حباب الصفقة فى النسمة الصعيدية
يا هجرة نهار الليل
لما الليلة بدرية
فحيح جنياتنا فى الحدبة الصعيد الحلة
يا قمحاتنا هو لبلب
يا تمراتنا هو لبلب
و يا اللوز الفتق فى الوادى هو لبلب
ويا سمحاتنا يا قمحاتنا هو لبلب ..
ويا البحر الطمح مدادى هو لبلب
ويا حجواتنا يا دعواتنا هو لبلب
سألتك بالذى ركز الأرض معبد وسوى الناس عليها مقام
سألتك بى حجى الأمات ودعواتنا
سألتك بى قميراتن و دمعاتنا
شليل وين راح ..
يكون خير الخريف فاتنا
وزى برق السماك الجاية دغشية
وزى زغرودة للبطن الكبارية
مرق من شامة القمرة
ومجرتق بوداعة الله
ومقدم بالعديل يبراك
أبشروا تعالوا ياجنيات
شليل ما راح .. شليل ما فات
شليل عند المسور مرق بقالو حصاد
شليل فوق التقانت قام خضار و بلاد
شليل مشوار.. شليل مسدار
شليلنا أرضنا يا جنيات
شليل ما راح .. شليل ما فات
حرازنا شليل .. شليلنا دليب
شليلنا دليل على البلدات بعد درب التبلدية
شليل ما راح .. شليل ما فات
شليل قايم نصايص الليل يتمتم ليلو وردية
مزارع بات على عشقين تراب بلدو
وسماح فوق بت مزارعية


عدل سابقا من قبل Admin في الثلاثاء ديسمبر 23, 2008 3:17 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 5:03 pm

بعد الرحيل
بعد الرحيل برجاك فوق هدب السنين
برجاك عيد فجر الليالي الفيها بحلم بيك يقين
عشمان أعيش لامن أشوفك في الدروب
شمعة فرح بسمة للعمر الحــزين

بعدك رحل فرح الفواصــل
وفي الحروف ذغرد جـــرح
ذان الجبـــين
وارتجف قلم الشعـــر
فوق الورق فجر اساي
صرخة حـــرف
حسرة وأنيـــن

والرحيق هجر البنفسج
والفراش بكي في إرتحالو
وانسكب عطر الأماني
فوق حقول الاحتمــال
ماتت أنفاس الاغاني
وقالت الفرحة الســلام
وفي العيون الحسرة طافــت
غاب فنار الابتسام

مكتوب علي احمل أساي
أرحل أطوف بين الحروف
امسح فرح وأكتب جرح
حافظ هواك رغم الظروف

ومهما طال الانتظار
تلقيني واقف منتظر
جوه في نبض الحروف
راجيك لما ترجعي للديار
تهدي للعمر إبتسامه
وليك تتقال القصائد
بيك تتحدد خطاي
وليك تتقال القصائد
بيك تتحدد خطاي


عدل سابقا من قبل Admin في الثلاثاء ديسمبر 23, 2008 3:17 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 5:05 pm

صعاب السكة
محمد طه القدال


بـتحمل صعاب السكة شان اصلك
وبتحمل عشان عارف جذور اصلك
مــا بـشكي الـوجع لـي زول
بـعـد حــد الـصـبر يـفتر
أسـيـبك لا ..لا مــا مـعقول
عــهـودك ديــمـة بـتـذكر
تـزيـد الالـفـة بـينا تـطول
نــلـم أشـواقـنـا نـتـصبر
بـالـحـنية نــروي شـتـول
بـتـكبر كــل يــوم اكـتـر
ظـروفـنا الـقاسية مـا بـتدوم
مـصـيـر الـدنـيـا تـتـغير
نـبـوح بــي سـرنا الـمكتوم
شــمـوع آمـالـنـا تـتـنور
تـغـرق فــي صـفاكي تـدور
يـفـوح هـمس الـنسيم يـنشر
ومـــا بـنـعاتب الـمـقدور
لــو كـتـب الـزمن سـطّر.
الرد مع إقتباس


عدل سابقا من قبل Admin في الثلاثاء ديسمبر 23, 2008 3:18 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
Admin
Admin
avatar

المساهمات : 166
تاريخ التسجيل : 21/01/2008

مُساهمةموضوع: رد: مكتبه الشاعر محمد طه القدال   الإثنين ديسمبر 22, 2008 5:11 pm

أجنحة المحبة
أحبابُُ نحن على الزمنِ
وشبابُُ نؤمنُ بالوطنِ
نفدى الجيران بأنفسنا
وبيعُ العمرَ بلا ثمنِ
*
للعُرْب نمانا آباءُُ
طابوا أعراقاً فى النَّسَبِ
والنيل تكسّر أمواجاَ
والشاطىْ جُنَّ من الطربِ
والطير تراقص نشواناً
يا فرحةَ عيدان القصبِ!
الحب الأخضر أجنحةُُ
ترتادُ العالَمَ أنحاءَ
تحكى للناس مفاخرنا
وتجوزُ سماءً وسماءَ
بالفكر تبث حضارتنا
بالفنِ سلاماً وصفاءَ
والدين العامرُ دعوتنا
تتفجَّرُ خيراً وعطاءَ
*
يا وادى النيل أيا أملاً
فى القلب توهّج أنْوارار
أفضالكَ جازت آفاقاَ
خيراتك فاضت أنهارا
والحب الرائع تبذله
للناس كباراً وصغارا
يا وطنَ الرحمة يا وطنى
كم أنت علاءً وفخارا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sagooor.yoo7.com
 
مكتبه الشاعر محمد طه القدال
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
sagooor :: منتدي شعراء السودان-
انتقل الى: