مكتبه الشاعر خليل فرح

Admin المساهمات : 166 تاريخ التسجيل : 21/01/2008

فى الضواحى وطرف المداين

في الضواحى وطرف المداين

يلا ننظر شفق الصباح

قوموا خلو الضيق في الجناين

شوفوا عز الصيد في العساين

يله نقنص نطرد نعاين

النهار أن حر الكماين

كلبي يا جمجوم أصله خاين

شوفوا كيفن يبرأ الملاين

هب شال وكشح المراح

للقنيص الخيل خف راسن

نحن ما بنخاف من مراسن

المكارم غرقنا ساسن والمجاهل

مين غيرنا ساسن

ان عطشنا نمز مر وآسن

وأن عشقنا بنعشق محاسن

فى المحاسن كفي يومنا راح

في الخميلة انجلت المحاسن

عيني حايرة ومشي قلبي جاسن

بعض حسنك هي يا محاسن

الحرير حين قدميك داسن

والزهور حين شفتيك باسن

والغصون من لدنك مياسن

والنسيم فاح بكر الملاح

يا الطبيعه الواديك ساكن

ما في مثلك قط في الأماكن

يا جمال النال في ثراكن

ياحلاة البرعن أراكن

في قفاهن تور قرنه ماكن

لا غشن لا شافن مساكن

في الخزام والشيخ والبراح

شوف صباح الوادي وجماله

وشوف خضاره وصيده ورماله

شوف يمينه وعاين شماله

شوف نسيم الليل صاحي ماله

شوف فريع الشاو مين أماله

القمر خجلان من كماله

والصباح لا بهل الوشاح

يا أم لسانا لسع معجن

كلمة كلمة وحروفه ضجن

ديل خدودك غير داعي وجن

ديل عيونك من غير سبه لجن

ديل دموعك من نظرة شجن

ده دلال ايه ده دلال معجن

محن الامات يا رداح

ماك نسيم الليل بي برودك

نامت الازهار فوق خدودك

غرد العصفور فوق عودك

النفوس ما اتعدت حدودك

ما عرفنا عدوك من ودودك

بس أنا المقسوم لي صدودك

يا حياتي وأملي اللي راح

Admin المساهمات : 166 تاريخ التسجيل : 21/01/2008

ود مدنى

ما له اعياه النضال بدني

روحي ليه مشتهيه ود مدني

ليت حظي سمح واسعدني

طوفه فد يوم بي ربوع مدني

كنت أزوره ابويا ود مدني

واشكي ليه الحضري والمدني

آه علي حشاشتي ودجني

وحنيني ولوعتي وشجنى

دار ابويا ومتعتي وعجني

يا سعادتي وثروتي ومجني

حين سألنا حاوي الوصب

من خمايل قرية القصب

قالوا جات سيرتك علي النصب

ونحن بين الروضة والقصب

صنفه بعرها قالن إن تصب

تربط الأحلام مع الخصب

كان حبيبنا وحاشا ما نصبي

ومن زمان فارقنا وهو صبي

تاني ما سمعنا انقطع خبره

يا حليلم طشوا ما اتخبروا

واحدة فيهن قالت انجبروا

فقر ابونا

وخدمة النبرو

الكنانة أكرمت نزلي

واغدقت من خيره كل زلي

إن حييت أو مت في الازل

ده مقدر طبعه في الازل

غايته بختم نفثتي الخطرت

بي تحية من حشاي شطرت

للتدور والطايره والما طارت

وسلاما ما الغصون خطرت

Admin المساهمات : 166 تاريخ التسجيل : 21/01/2008

ما بال طرفي

ما بال طرفي عنه النوم قد أبقا

واسترسل الدمع حتى أخجل الورقا

في يوم عرس أرانا كل فاتكة

باللحظ بالقد بالخصر الذي نطقا

ونغمة من رخيم الصوت كاد لها

عقولنا ان ترينا الطيش والترقا

قابلننا بعيون زانها حور

والسحر معني علي اطرافها نطقا

واصطف جمعهم المأنوس وانفردت

منهن جؤزرة تحكي المها الحدقا

وخلفها سائق يحدو اذا خشيت

منه اللحاق تمد الردف والعنقا

ان رامت البعد عنه قام يجذبها

من الروادف حقف أو كثيب نقا

بقامة مثل غصن البان إذ غسقا

ووجهها القمر الوضاح مبسمه

قد زانه لعس السفلي وما نطقا

وشلخها في انتصاب لا اعوجاج له

كألف فارس بالخدين ملتصقا

والجيد لو لا حلي فيه تكنفه

رأيت فيه حباب الماء مندفقا

كأنما هي بلور تعهده

وصائف الروم لم تنظر به رنقا

يزهو بها الوشي ادلالا برونقها

وإن تجرد كان الحسن متفقا

تلك الفتاة التي هام الفؤاد بها

والطرف من عائدات الشوق قد أرقا

تهافتت نحوها أبصارنا عجبا

بخلقها فأرتنا أحسن الخلقا

Admin المساهمات : 166 تاريخ التسجيل : 21/01/2008

ماهو عارف

ماهو عارف قدمه المفارق

يا محط آمالي السلام

في سموم الصيف لاح له بارق

لم يزل يرتاد المشارق

كان مع الأحباب نجمه شارق

ماله والأفلاك في الظلام

يا دهر أهوالك تسارق

منها كم كم شابت مفارق

ما علينا الفات كله فارق

رقنا وله نعيد الملام

من حطامك أنا غصني وارق

في شن أبقيت للطوارق

غير قليبا في همومه غارق

ولسانا برده الكلام

ويح قلبي الما انفك خافق

فارق ام درمان باكي شافق

يا أم قبايل ما فيك منافق

سقي أرضك صوب الغمام

يا بلادي كم فيك حاذق

غير الهك ما أم رازق

من شعاره دخول المأزق

يتفاني وشرفك تمام

مسرح الغزلان في الحدايق

والشوارع الغر والمضايق

قول لي كيف أمسيت دمت رايق

دام بهاك مشمول بالنظان

مجلس اللذات في النمارق

والترف لا زال وصفه خارق

ضاري حسك فاح جانا مارق

وله قاطعو الريح ما هو لام

في يمين النيل حيث سابق

كنا فوق أعراف السوابق

الضريح الفاح طيبه عابق

السلام يا المهدي الامام

أين مني الودعته شاهق

باكي ناهد لسه مراهق

عيني ما بتشوف الا شاهق

أين وجه البدر التمام

أين مني الفي زهوه باسق

في شبابه نقي من مفاسق

بين ثيابه البيض المناسق

حولك اشبه رتل الحمام

يا بريد الجو فوقي حالق

ميل علي الروح ليها خالق

عدت سالم قول وأنت عالق

مقرن النيلين كيلو كام

الحبايب لفتوا الخلايق

بيني وبينهم قطعوا العلايق

ان دلال ان تيه كله لا يق

نحن ما مجينا الخصام

يا جميل يا نور الشقايق

أملأ كأسك واصبر دقايق

مجلسك مفهوم شوفه رايق

عقده ناقص زول ولا تام

من فتيح للخور للمغالق

من علايل ابروف للمزالق

قدله يا مولاي خافي حالق

بالطريق الشاقه الترام

ما يئسنا الخير عوده سايق

الحي يعود ان أتي دونه عايق

الي يوم اللقا وانت رايق

السلام يا وطني السلام

Admin المساهمات : 166 تاريخ التسجيل : 21/01/2008

أذكر بقعة ام درمان

***

أذكر بقعة أم درمان

وأنشر في ربوعها أمان

ذكر يا شبابي زمان

دارنا ودار أبونا زمان

فيها رفات جدودنا كمان

ما بنساك خلقه ضمان

جنة وحور حماك أمان

ذكر يا شبابي زمان

بطرا الأسسوك زمان

كانوا يحلحلوا الغرمان

يساهروا يتفقدوا الصرمان

ذكر يا شبابي زمان

في السودان فتيح معروف

ولسه أب عنجه خوره سروف

ود نوباوي زول معروف

باقى وديك مشارع أبروف

ذكر يا شبابي زمان

كانوا جبال تقال ومكان

نزلوا اتربعوا الأركان

خلوا البقعة كل مكان

آهلة وزارة بالسكان

ذكر يا شبابي زمان

ليه يا كعبة العربان

غاضبة وفين عريسك بان

قبال نسأل الركبان

حبك من حسودك بان

ذكر يا شبابي زمان

Admin المساهمات : 166 تاريخ التسجيل : 21/01/2008

الشرف الباذخ

نحن ونحن الشرف الباذخ

دابي الكر شباب النيل

قوم وم كفاك يا نايم

شوف شوف حداك يا لايم

مجدك ولي وشرفك ضل

إمتي تزيد زيادة النيل

نحن نطارد العنزة الفاردة

نحن نزود مشارع النيل

نحن برانا نحمي حمانا

نحن نموت ويحيا النيل

ما بنندس ما بنتوصي

نحن نكيل برانا نشيل

نحن الطينة ومطر العينة

نحن الوادي برقه يشيل

نحن الصولة سيوف الدولة

نحن كنانة اسماعيل

بابه العالي وشرفه الغالي

كان لجدودنا ظله ظليل

يا حكامنا جيبوا البينه

ولا انقرعوا كفوا الشينه

ده ود عمي وده ضريب دمي

انت شنو طفيلي دخيل

يا نزلانا أمرقوا الذمة

كيف ينطاق هوان الأمة

شالوا حقوقنا وزردوا حلقونا

ديل عاوزين دمانا تسيل

من تبينا قمنا ربينا

ما اتفاسلنا قط في قليل

ما فيش تاني مصري سوداني

نحن الكل ولاد النيل

Admin المساهمات : 166 تاريخ التسجيل : 21/01/2008

بين جناين الشاطىء

بين جناين الشاطىء وبين قصور الروم

حي زهرة روما وأبكي يا مغروم

دره سالبه عقولنا لبسوها طقوم

ملكة باسطة قلوبنا تبين عليها تقوم

في الطريق ان مرت بالخلوق مزحوم

كالهلال الهل الناس عليها تحوم

شوف عناقد ديسها تقول عنب في كروم

شوف وريدا الماثل زي زجاجة روم

القوام اللادن والحشا المبروم

والصدير الطامح زي خليج الروم

خلي جات متبوعة الصافية كالدينار

في القوام مربوعة شوفا عالية منار

موضة آخر موضة هيفا غير زنار

روضة داخل روضة غني فيها كنار

شوف جبينا الهل ضو فوقه فنار

منه هل الشارع منه بق ونار

طالعة ما بتقابل زي لهيب النار

تحرق البتهابل والبعيد في نار

Admin المساهمات : 166 تاريخ التسجيل : 21/01/2008

تم دور وأدور

تم دور وادور

عم نوره شال

فات الحله نور

زي بدر التمام

***

واحدين قالوا نور

واحدين قالوا دوب

مروي ما بتنور

زي بدر التمام

***

مين يقوم يتهور

يبري القيف هناك

تحته الدابي كور

زي بدر التمام

***

قالوا الكون اتطور

لا عاشق عفيف

لا جميل إتصور

زي بدر التمام

***

الحسود يتضور

ناره ماكله لسانه

كله زور ومزور

زي بدر التمام

***

الطريق الحور

دمي ما بروح

سيدة ليش يتجور

زي بدر التمام

**

هز شوقي وتور

يا نديم إزاي

جرحي المخفي غور

زي بدر التمام

***

يا قليب إتجبر

قوم وريني كيف

الكرام تتصبر

زي بدر التمام

***

نحن ما بنتعبر

النفوس أن حبت

تستحى وتتكبر

زي بدر التمام

***

ما خبير أتخبر

في الزمان الفات

والجديد إدبر

زي بدر التمام

***

أوعي لا تتشبر

هل رأيت لك عاشق

بالغرام يتنبر

زي بدر التمام

***

نحن ما بنطفر

ما بنهاب سفيه

إلا ما بنتزفر

زي بدر التمام

**

قولوا لي البتنفر

ما شالن قناع

المعاك تتوفر

زي بدر التمام

**

يا زميل إتشطر

شن بتشوف حداك

إلا حور مبطر

زي بدر التمام

**

يبقي يومنا مطر

ماله الكون دهين

والفريق معطر

زي بدر التمام

***

النحر مغمر

والسباته حارة

والمجال مضمر

زي بدر التمام

**

الشعر مخمر

يرشح كله ند

عردب المجمر

زي بدر التمام

**

قام محمد بشر

هز فوق تيجانن

سل سيفه وكشر

زي بدر التمام

***

قول معاي وإتفشر

نحن سياج عروضن

نحن يوم المحشر

زي بدر التمام

***

يا حسن اتذكر

طيب ليلتنا ديك

والصباح السكر

زي بدر التمام

***

المدام ما اتنكر

لا من ديكنا صاح

فوق رؤوسنا اتحكر

زي بدر التمام

**

كل شىء مفسر

ما في شىء غريب

والعسير ميسر

زي بدر التمام

**

ما في عين تتحسر

دام عريسنا دام

والحسود إتحسر

زي بدر التمام

Admin المساهمات : 166 تاريخ التسجيل : 21/01/2008

زاهى فرعك

زاهى فرعك نما وسما

تشبهى الضو فى السما

الخدود نارها مضرمة

فى حشاى واضعة مفرمة

بي هلاكنا أنت مغرمة

طرفك الساهى كم رمى

سمحة قامتك على التما

فاهك البسمة خاتما

للبدور خدك إنتمى

فى العيون شلخك احتمى

يالقلب تقسما

وحبيب تبسما

بدر تم وقد سما

اه ما أبعد السما

يا نسيم أمشى سالما

بى لطيف شيشا حلما

بالعلى أ[قى كلما

وهاك رويحتى سلما

مجلس الأنس ضمنا

نحنا والكانو يمنا

والسرور كله عمنا

مافى هم لا همنا

مافى جاهل بذمنا

يا شقاوة البشمنا

العيون هادرة دمنا

أصله ما بيبرأ سمنا

وقفت بانة النقا

ديسا طاويها فالقا

النظر راح يسارقا

صد قال فوق خالقا

الحرير ماله خانقا

والحجيل يمشى زانقا

صيدة روايها ما اتلقى

كل شىء فيها قالقا

جلست شوف تأملا

وقفت ضجت الملا

صاح شاديها وإتملى

متنا ما سمعنا ململة

شوف وريدا وسوالفها

شوف صديرا المزالفا

شوف ضميرا الموالفا

من كفيلا المخالفا

ليلة فى غاية الصفا

حفلة معدومة الصفة

يا نديم عقب أوصفا

وأقطف أزهارها صفصفا

غصن بان إذا مشى

واذا مال واختشى

فضح الغصن والرشا

لك يا غصن مافشى

لك يا ريم ما تشا

لك فى داخل الحشا

روضة طيبة وشى

الحسان تمشى قادمة

يضوى العتمة كالدما

يا عيومى تهدما من

صياح أزرفا دما

كوكب السعد إنتمى

لك يا صاحب النما

فسلام عليك ما

لبس الروض نمنما

العيون ناعسة صاحية

والخدود يقطرن حيا

البصيبن ما حيا

ما بتزيل عطشته الحيا

إنت يابر يا سلام

للجميع أكتب السلام

وأحفظهم فى صلا وسلام

مع أحمد عبد السلام

Admin المساهمات : 166 تاريخ التسجيل : 21/01/2008

عزة في هواك

عزة في هواك عزة نحن الجبال

وللبخوض صفاك عزة نحن النبال

عزة ما بنوم الليل محــــال

وبحسب النجوم فوق الرحال

خلقة الزاد كمل وأنا حالي حال

متين أعود أشوف ظبياتنا الكحال

عزة ما سليت وطن الجمــال

ولا أبتغيت بديل غير الكمــال

***

وقلبي لي سواك ما شفتو مال

خذيني باليمين وانا راقد شمال

عزة ما نسيت جنــة بلال

وملعب الشباب تحت الظلال

ونحن كالزهور فوق التلال

نتشابي للنجوم وانا ضافر الهلال

عزة جسمي صار زي الخلال

وحظي في الركاب صابه الكلال

وقلبي لسه ما عرف الملال

أظنه ود قبيل وكريم الخلال

عزة ما أشتهيت نوم الحجال

ولا السوار بكي في يمينا جال

وعزة في الفريق لي ضيق مجال

قبيلة بت قبيل ملأ الكون رجال

***

عزة شفت كيف نهض العيال

جددوا القديم تركوا الخيال

روحك أم سماح سري كالسيال

شجوا الفؤاد حيوا محسور الليال

عزة في الفؤاد سحرك حلال

ونار هواك شفا وتيهك دلال

ودمعي في هواك حلو كالزلال

تزيدى كل يوم عظمة ازداد جلال

***

عزة في حذا الخرطوم قبال

وعزة من جنان شمبات حبال

وعزة لي ربوع ام در جبال

وعزة في الفؤاد دوا يشفي الوبال